fbpx

اسطورة الامان الوظيفي

blind1

اي حد فكر يبدا فريلانسج - او بزنس خاص بيه - ، اكيد شاف بوستات من نوعية المقارنة بين فكرة المشروع الخاص والوظيفة الثابتة.
وعلي الرغم من الاختلاف الكبير بين انصار كل فكرة وتحيز كل فريق لرأيه، الا انهم غالبا كلهم بيتفقوا علي نقطة واحدة وهي ان الوظيفة الثابتة امان وان عشان تبدا بزنس خاص بيك لازم تخاطر.!

طبعا مفيش دخان من غير من نار، فايه بقي مدي صحة الكلام ده؟

كان في وقت الكلام ده مظبوط، كان كل اللي عليك انك تتخرج بشهادة كويسة وتتقبل في شركة وبس! مش
محتاج تقلق من حاجة تاني.

مكنش في ناس كتير مؤهلة أو سوق عمل مليان بالخريجين زي دلوقتي ، او تخفضيات عمالة مهولة زي الي .شفناهم ال ٢٠ سنة الي فاتوا عشان تخاف من ان الشركة تستغني عنك 
وبالتالي الموظف مكنش بيخاف من انه يصحي من النوم يلاقي نفسه من غير شغل و، مش شاغل باله الشركة بتكسب ولا بتخسر.

حاليا الوضع اختلف لو الشركة بتخسر لازم تقلق لان ده معناه تخفيض عمالة في الطريق او اسوأ .


كلنا شفنا امثلة لناس محترفة وقضت سنين في مكان بتكبر فيه ، وفي الاخر لقت نفسها من غير شغل افتح لينكدان وخداك لفة كدا وشوف كام بوست من النوعية دي.

من كام يوم علي لينكدن شوفت بوست لمهندس مدني، كان رايح يطلب اجازه من الشغل عشان فرحه الاسبوع اللي جاي.

لقي المدير بيقله ان ده اخر شهر ليه وان الوضع في الشركة مش تمام ،وانهم محتاجين يمشوا ناس!

في مقال للوطن العدد ( ٢٠٨٨ ) بتاريخ ١٦ يناير ٢٠١٨ ، ٣ اطباء نفسيين متخصصين بيناقشوا ان ٢٠٪ من مرضاهم بيجوا العيادات الخاصة بسبب ضغوط الوظيفة او الخوف من فقدانها بشكل مباشر.

الخوف من فقدان الوظيفة.. غول الأمراض النفسية ومتخصصون: 20% من المرضى بسبب ضغوط بيئة العمل

وناقشوا ان حتي انتظار الراتب اول كل شهر هو ضغط في حد ذاته بسبب حياة الاقساط والديون والجمعيات الي منتظرة المرتب و مفاجاة انتهاء المرتب بعد ايام.

وان معظم المشاكل النفسية والاجتماعية متعلقة بمشاكل مادية بشكل او باخر.

وطبعا كلنا عارفين ان نسبة ٩٠٪ من الناس مش هتروح لدكتور نفسي عشان مشاكل العمل.

مفيش وقت ولا فلوس سعادتك للرفاهيات دي! والا كنا شفنا ارقام مرعبة

وهم الاســــتقرار في الوظيفة

في دراسة عن مكتب الاحصاءات للعمالة في امريكا ,( Bureau of Labor Statistics) متوسط فترة العمل عند نفس الشركة هي تقريبا ٤ سنين ونص والمتوسط ده بيقل للموظفين الصغيرين في السن.

  • متوسط الفترة للموظفين من سن ٥٠ ل ٦٤ هي ١٠ سنين ( ١٠.١ سنة
  • في حين الموظفين من سن ٢٥ ل ٣٤ هي حوالي سنتين ونص (٢.٨ سنة
  • والموظفين من ٢٠ -٢٤ كانت متوسطة الفترة سنة تقريبا ( ١.٢ سنة

استقرار ايه بقي لما الشاب يكون بيقضي اقل من ٣ سنين في نفس المكان؟

وهم الامــان المــادي

زمان كانت الوظيفة بتوفر امان مادي لان المرتبات كانت عالية بالنسبة للحالة للاقتصادية واسعار السلع مثلا

  • راتب المعلم في السبعينات كان ٢٨ جنيه في حين ان جرام الذهب عيار ٢١ كان ب ١.٢٠ جنيه يعني يكفي لشراء حوالي ٢٣.٣٣ جرام او ما يعادل حوالي ١٢ الف جنيه حاليا!
  • كان الحد الادني للاجور للعمال حسب قانون ١٩٧٨ هو ١٨ جنيه ، يكفي لشراء ١٥ جرام من الذهب عيار ٢١ وهو ما يا يعادل حوالي ٧،٥٠٠ جنيه طبقا لاسعار الذهب الحالية.

دلوقتي معظم الموظفين هدفهم يوفروا متطلبات الحياة والمعيشة الاساسية علي الرغم من تعليمهم وشهادتهم وتعبهم زمان عشما في الراحة اللي بعدين زي ما كلينا اتربينا واتعلمنا من الاهل و الجامعة والمجتمع والناس!

مستقبل الوظايف في ظل الذكاء الصناعي و الخوارزميات

لو دورت في جوجل عن ' 9-5 jobs are dying'هتلاقي العنوان ده في اشهر الجرايد، المجالات، والمواقع العالمية والسبيين الرئيسين هما

  1. التطور التكنولوجي ،الذكاء الصناعي والخوارزميات البرمجية
  2. الفريلانسج

والموضوع مش مجرد كلام جرايد لناس فاضية، الابحاث والاحصائيات الحالية بتاكد الكلام ده.

زمان كنا فاكرين ان في وظايف ومهارات هتفضل خارج قدرات الروبوت للابد، مع الوقت عرفنا ان الابد في الحالة دي هي ١٠ سنين مثلا.

من وقت قصير كان المثال المفضل عن الحاجات اللي الروبوت مش ممكن يعملها لكن اي طفل يقدر يعملها بسهولة هي التعرف علي الصور والوجوه، ودلوقتي؟

خوارزميات التعرف علي الوجوه بتقدر تتعرف علي الوجوه بسرعة ودقة اكبر من القدرات البشرية.

في سنة ٢٠٠٤ ، بروفسور" فرانك ليفي" من معهد ماساتشوستس للتكنولوجيا و بروفسور ”ريتشرد مورنان“ من جامعة هارفارد نشروا بحث عن سوق العمل والوظائف المحتمل انها تستبدل بالروبوتات والخوارزميات.

الظريف بقي انهم ذكروا مثال لسائق الشاحنة كمثال لوظيفة ”مش ممكن ” تتم بصورة الية في المستقبل القريب.

تقريبا بعد ١٠ سنين جوجل و تسلا حولت المستحيل ده لحقيقة. ده بيتزا هت بدات اول روبوت لتوصيل البيتزا!

في سبتمبر ٢٠١٣ نشر باحثين في اوكسفورد "كارل فريي“ و ”مايكل اوسبورن" بحث بعنوان مستقبل التوظيف“ ،

بيقيسوا فيه احتمالية ان وظايف معينة تتبدل بالخوارزميات في خلال ال٢٠ سنة الجايين

" The future of employment"

والنتيجة ان ٤٧ ٪ من الوظايف في امريكا في خطر مؤكد بسبب الذكاء الصناعي. وان في قطاعات وصناعات باكملها هتختفي ويتم ادارتها بالكامل بصورة الية.

فيه حوالي ١٠٠ وظيفة نسبة اختفاءهم من ٩٥٪ ل ٩٩٪ ،
و ٢١٦ وظيفة بنسب ما بين ٨٥٪ و٩٩٪ تقريبا !

وظايف زي الكاشير، الحكام، عمال البناء، سكرتارية، محاسبة، التسويق الهاتفي، الارشاد السياحي هي مثال صغير في قائمة من الوظايف المتوقع انها هتختفي في خلال ١٠ : ١٣ سنة اللي جايين.

لو كنت فاكر ان الكلام ده في امريكا وان الشرق الاوسط موضوع مختلف، فالراسمالية والاسواق العالمية وسياسة الانفتاح والشركات متعددة الجنسيات معندهاش حدود جغرافية.

وعموما مؤتمر قمة الحكومات العالمية وبالاشتراك مع معهد مكنزي العالمي للابحاث بياكد الكلام ده،

اتنشر بحث بعنوان ”مستقبل الوظائف في الشرق الاوسط“، والدراسة كانت بتشمل مصر، السعودية، الامارات، الكويت ، البحرين و عمان .

وبتدرس نسبة الوظايف اللي ممكن تتحول لصورة آلية والفوائد الاقتصادية اللي مترتبة علي التحول ده.

النتايج الرئيسية بتقول انه ٤٥٪ من الانشطة والوظايف في الشرق الاوسط يمكن تحوليها لصورة الية بتقنيات موجودة حاليا بنسبة اقل بقليل من النسبة العالمية

حيث ان متوسط المعدل العالمي هو ٥٠ ٪ من الوظايف الحالية.مصر مثلا هي الاعلي بنسبة ٤٨ ٪ ، البحرين ٤٥٪ ، الامارات والكويت ٤٣٪ ، السعودية وعمان ٪٤١

طيب لو استبعدنا مصر مؤقتا وقلنا ان العوائق المادية ممكن تاخر الموضوع شوية، طيب بالنسبة للامارات والكويت والسعودية؟

الدول دي عندها الامكانات المادية والحوافز المادية و السيكولوجية الي تخليها تعمل ده.

التقرير بيقولك ٣٦٦،٦ مليار دولار من الاجور يرتبطوا بانشطة بدوام كامل يمكن تحويلها لصورة الية حاليا من الناحية التقنية.

في الحقيقة الدراسة غطت بتمعن ان ازاي دولة زي الامارات باتجاهها للحلول دي هتوفر ٩٣ ٪ من الوظايف اللي بيشغلها عمالة مغتربة.

وازاي هيساعد في زيادة انتاجية القطاعات اللي بتعاني ندرة من المواهب المحلية او انخفاض انتجاية العمال.

الفريلانسرز من اقلية للاغلبية

السبب التاني الرئيسي هو الفريلانسج، لان معظم قوة العمل هتكون فريلانسرز طبقا للاحصائيات الحالية واستطلاعات الاراء.

اتحاد الفريلانسرز وشركة ابورك عملوا تقرير مفصل عن الفريلانسج في امريكا، حاليا في ٦٢.٥ مليون فريلانسر في امريكا بيساهموا ب ١.٤ ترليون دولار ( ايوة ترليون ، الف مليار مش غلطة ولا حاجة) .

هيوصل عددهم ل ٨٦.٥ مليون بحلول ٢٠٢٧ ، وهيكون عددهم اكتر من الموظفين في وظايف ثابتة لاول مرة في التاريخ

طبقا لمعهد ماكنزي العالمي للابحاث

، ٢٠: ٣٠٪ من القوة العاملة في امريكا واروربا بيشتغلوا فريلانسرز بعيدا عن العمل المكتبي او الوظيفة الثابتة مع توقعات انها توصل ٥٠٪ في خلال ١٠ سنين.

طبعا بالنسبة للشركات، اكيد من الارخص والاضمن ليها تتعامل مع فريلانسر من انها تعين موظف بمرتب ثابت و تدفع في تدريبهم وتامينهم الصحي !

طبقا لمجلة فوربس الامريكية ٦٦٪ من الشركات الكبيرة بتستخدم فريلانسرز عشان تقلل مصاريف التوظيف، و ٥٨٪ من الشركات في الاسواق المتوسطة بتسخدم فريلانسرز عشان توصل لناس عندها خبرات اكبر.

الخــلاصـــــــــــة

  • لو كانت الوظيفة هي مصدر دخلك الاساسي و خسارتها ممكن يسبب مشكلة كبيرة ليك يبقي لازم تبدي تفكر في بديل يوفرلك الامان والاستقرار.
  • الفرلانسج من احسن البدائل في الوقت الحالي لانه كبزنس مش محتاج منك راس مال او اوراق واجراءات روتينية مملة ومخاطرة كبيرة عشان تبدا.

يعني اروح اقدم استقالتي ، او اسيب جامعتي وابتدي فرلانسج؟ اكيد لا. في الحقيقة دي من الغلطات اللي الناس بتعملها لما تبدا بتخلي بيها الفريلانسج اخطر من الوظيفة.

  • اول خطوة انك تبدا فريلانسج كمصدر دخل اضافي ولما تقدر تحقق دخل ثابت وتبقي واثق انك تقدر تغطي كل مصاريفك تفكر انك تكمل وتستقيل او انك تخليه بس حاجة اضافية

في المقال الجاي هناقش بالتفصيل ازاي تخلي الفرلانسج امن اكتر من الوظيفة وازاي تتلاشي الغلطات اللي بتخليه العكس.

بس خلينا دلوقتي نبدا بنقطة مهمة، الناس بتغفل عنها.

الفريلانسج تعريفه انك بتبيع خدمات للعملاء بناء علي مهاراتك وخبراتك عشان تحل ليهم مشكلة او تحقق لهم هدف.

فكونك تقدر تحدد مهاراتك او تتعلم مهارات جديدة وتعمل منها خدمة (منتج) الناس محتاجها، و تلاقي العميل وتقنعه يشتغل معاك ده ضمان ليك انك مش هتحتاج لوظيفة او لمرتب ومش محتاج تقلق لانك عندك مصدر دخل احتياطي، وان حتي لو المجال الي انت شغال فيه اختفي في المستقبل هتقدر تشوف ايه الخدمات الي تقدر تقدمها بناء علي مهاراتك وخبراتك الجديدة و تعرف ازاي تبني بزنس جديد.

ده يخليك تبص للموضوع بصورة ابعد، يخليك تعرف ان مهارة انك تجيب عميل اهم من العميل نفسه.

خبرة انك تبني بزنس من الصفر وانك تعرف قيمة شغلك وتحدد سعره اهم من انك تكسب شغلانة او ان حد يقلك سعر ساعة تبدا بيه وان مهارات التواصل والتسويق والمبيعات اللي فريلانسرز كتير بيتجنبوها هي الاساس والخطوة الاولي عشان تبني بزنس تقدر تحقق منه دخل ثابت يعتمد عليه يوفرلك امان حقيقي.

انت لو قدامك فرصة الاختيار ما بين وظيفة ثابتة و مابين المهارات الي تقدر تبني بيها بزنس ناجح ليك هتختار ايه ؟ و ليه؟

انا اخترت اني اشتغل فريلانسر لما كنت طالب في كلية الهندسة ولو رجع بيا الوقت كنت هختار اني ابدا بدري شويتين.

9 responses

  1. اللهم بارك…مبسوط ومُستفيد حقيقى بالكتير مللى قريته ما شاء اللَّه…بارك اللَّه فيك وليك…تمنياتى بكل جميل

  2. اسلوب المقال رائع والمحتوى غني جدا.. لدرجة ان كل مقطع يعتبر مقال بحد ذاته.. أشكرك جدا على المجهود والافادة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *