fbpx

ازاي تتجنب العميل النصاب

Canva-null-3-2

واحدة من أكبر المشاكل اللي بنشوف فريلانسرز كتير بيشتكوا منها، هي خوفهم من وجود ناس او عملاء ممكن تنصب عليك بعد ما تعمل ليهم الشغل وما تدفعش.

ودايما هتلاقي بوستات كتير من فريلانسرز اتنصب عليهم علي جروبات الفيسبوك، بل وهتلاقي جروبات مخصوصة عن العملاء او الشركات النصابة في كل مجال تقريبا!

وعلي الرغم ان الموضوع ممكن يبان مخيف، لكن في الحقيقة ان تقدر تتجنب ٩٩٪ من الناس دي بقواعد بسيطة

وكل الناس اللي بيتنصب عليها بتلاقيها انها بتقول انها عارفة ان الغلط كان منها!

هنتكلم عن ليه الناس دي بتقع في الغلطات دي رغم معرفتها بيها، وايه هي القواعد اللي محتاج تمشي عليها لو عايز تشيل من دماغك موضوع النصب ده بصورة نهائية.


في البداية هنتكلم عن العملاء برة مواقع الفريلانسج وبعدين هنتكلم عن العملاء اللي عن طريق المواقع دي

١- اختار عملائك بنفسك

،ناس كتير هدفها ان العملاء تيجي لحد عندها ، مش انها هي اللي تختار عملائها وتعرض عليهم خدامتهم

وطبعا ده كتفكير او كهدف بعيد صح ، لكن المشكلة انهم بيعملوا كده غلط وفي توقيت غلط

بتلاقي الفريلانسر اول ما يبدأ بيكون هدفه يبني قاعدة عملاء بغض النظر عن جودة العملاء دي

بيبدا ينشر شغله في كل مكان وكل جروب وكل موقع

بيقلل من سعره وبيعمل عروض وخصومات

بالتالي بيجذبوا نوعيات معينة من العملاء اللي بتدور علي الي حاجات دي

، بيعمل قاعدة مكونة من عملاء بتدور علي ارخص سعر
وكل اساليب التسويق لنفسه هي اساليب بتجذب الاشخاص دي وبتبعد الاشخاص اللي بتدور علي القيمة

وفي النهاية ده بيعرضه لمحاولات نصب اكتر ، لان بالطريقة دي كل الناس اللي هتتواصل معاه هي ناس عايزة اقل سعر، وطبعا لو قدرت تاخده ببلاش فاكيد هتعمل ده

علي العكس بقي لو انت اللي بتختار عملاءك وانت اللي بتعرض عليهم الشغل

فانت هنا المتحكم في نقطة انت بتكلم مين، وتقدر طبعا تتاكد من جودة العملاء لانك انت اللي بتختارهم بنفسك

الاهم بقي انك هتتجنب ٩٩٪ من محاولات النصب بالطريقة دي بس!

ببساطة النصاب دايما هو اللي بيجي ليك بالعرض بتاعه، شخص بيكون مجهز خطة او حيلة

.وبيستغل ثقة الطرف الثاني او طمعه فانه يتم عملية النصب دي

فانت لو بتختار العملاء اللي بتتواصل معاها ، فانت ضامن ان الشخص ده مش مجهز خطة .
انه ينصب عليك

غير انك بتكون الشخص اللي بيحط قواعد الاتفاق والدفع، اللي طبعا بتكون ضامنة لحقك.

امال امتي بقي هيجيلي عملاء بدل ما انا اللي اختارهم؟

العملاء دي هتيجي ليك بعد ما بتدأ تختار عملائك وتشتغل معاهم وتحقق نتيجة كويسة.

وقتها هتلاحظ ان فيه نسبة منهم هتفضل عملاء مستمرة معاك ويبقي بينكم شغل مستمر.

وطبعا كل ما بيزيد عدد العملاء اللي اشتغلت معاهم، بتزيد النسبة دي

كمان الناس دي بترشحك لشركات او اصدقاء ليهم

ومع الوقت اسمك بيبقي معروف نتيجة لانك اشتغلت مع عملاء كتير
بقيت brand يا معلم .

واضح طبعا ان دي مرحلة متقدمة، ومش منطقي تسعي ليها في البداية

ولا حتي محتاجها عشان تبني بزنس يحقق ليك دخل مستقر تقدر تعتمد عليه

٢- مفيش شغل ابدا بدون وجود اتفاق واضح

قبل ما تبدأ اي شغل مع عميل جديد لازم الاول يكون فيه اتفاق واضح بينك بينه

الاتفاق ده علي السعر اللي هيدفعه العميل ومواعيد الدفع ، وميعاد التسليم وايه اللي المفروض تسلمه او تعمله بالظبط

وعلي الرغم من منطقية القاعدة دي، الا انك لو بصيت علي ٩٠٪ من الناس اللي نزلت بوستات انها تنصب عليها من عميل، هتلاقي ان مفيش بينهم اي اتفاق واضح خصوصا علي مسالة السعر دي وميعاد الدفع.

اللي بيحصل هنا، ان الاشخاص دي بتكون لسه بتبدأ وحرفيا كل همها انها تجيب اول عميل واول شغل

ويخافوا من نقطة مناقشة السعر مع العميل لان العميل ممكن يرفض لاي سبب والمشروع يروح عليهم

فيكون تفكيره ان كده انا لما ابدأ من غير كلام في النقطة دي، فانا هضمن الشغل والعميل

وبعد كده اكيد مش هنختلف كتير يعني، وحتي لو العميل فاصل او قلل السعر شوية مش مشكلة

بس اللي بيحصل ساعتها ان العميل مش بيدفع اصلا، ولو دفع بيكون مبلغ اقل بكتير من القيمة اللي تستحقها

عشان كده، مينفعش تتجنب القاعدة دي لاي سبب من الاسباب

٣- ماتبدأش شغل من غير عربون

برده نفس السبب الي بيمنع الناس من مناقشة السعر والتفاصيل المهمة مع العميل قبل المشروع

هو اللي بيمنعهم من طلب عربون او جزء من المبلغ قبل الشغل

وفي الحقيقة هنا الموضوع بيكون اصعب، لان معظم الناس بتحس بصعوبة في نقطة طلب الفلوس من شخص غريب نتيجة لعاداتنا وتربيتنا والوعي الجمعي لمجتمعنا

بس دايما خليك عارف ان الشخص الجاد اللي فعلا محتاج شغلك
عمره ما هيكون عنده اعتراض علي دفع عربون

لكن الشخص النصاب دايما هيكون عنده الف مشكلة واعتراض علي القاعدة دي

، طبعا ممكن انه في عملاء ترفض المبدأ ده وتكون مش نصابة بس هنا المشكلة في القاعدة دي

المشكلة بتكون هنا ان الفريلانسر مقدرش يقنع العميل اللي بيتكلم معاه انه فعلا يقدر يحل مشكلته

بمعني انه هنا المشكلة في
Sales Process or Negotiation & Handling Objections

طبعا المواضيع دي متقدمة ، ومش هدفنا هنا الكلام عنها ، لكن تقدر تعرف انك تقدر تطبق القاعدة دي

وانت مطمن ان كل العملاء اللي هتشتغل معاها مش بتحاول تنصب عليك

وهتلاقي مواضيع مخصصة لازاي تتفاوض مع العملاء،

و ازاي تتغلب علي اشهر الاعتراضات وقت قفل الصفقة مع اي عميل 

بالنسبة بقي لو بتشتغل علي مواقع الفريلانسج زي
Upwork, Freelancer, Guru

طبعا واحدة من مميزات المواقع دي انها بتضمن للعميل والفريلانسر حقوقهم المادية ، حيث ان العميل
بيدفع قيمة المشروع للموقع، والموقع بيسلمها ليك بعد ما تسلم العميل الشغل اللي اتفقتم عليه

وهنا معظم المشاكل بتيجي من قلة خبرة الفريلانسر بالمواقع دي ومعرفة سياسة الاستخدام اللي المفروض .
وافق عليها قبل انضمامه للموقع

وبرده تقدر تتجنبها لو اتبعت القواعد البسيطة دي


١- متبدأش شغل الا لما العميل يبعت ليك عرض،
ويدفع الفلوس للموقع يعني تلاقي

Milestone paid
or
Amount on escrow

٢- قبل ماتقبل العرض ، اقرأه كويس واتفقوا
علي التفاصيل

٣- خلي كل تواصلك مع العميل وتسليمك للملفات يكون من خلال الموقع نفسه والرسايل
الخاصة بيه

* قبل ما تبدأ اي شغل ل
milestone
جديدة
او لشغل اضافي

اتفق علي السعر، ولازم العميل يدفع للموقع الاول

٤- لو اتواصل معاك عميل من خلال الموقع وطلب منك تشتغلوا برة او يدفعلك بشكل مباشر .
ارفض من غير تفكير

٥- اي عميل يطلب منك انك تدفع اي فلوس لاي سبب او تحت اي مسمي.
ارفض بدون نقاش

٦- العميل اللي هيحاول تقنعك تعمل شغل مجاني او بسعر رخيص مقابل شغل مستمر او انه هيرشحك لكل معارفه وناسه وأصحابه

مش هتشوف وشه تاني ولا هيجي ليك منه لا شغل جديد ولا عملاء


زي ما قلنا بالرغم من ان القواعد دي
بسيطة جدا
لكنها ممكن تمنع انك تتحط في موقف سيء
وانك تضيع وقت ومجهود علي الفاضي


وانت، هل اتنصب عليك بسبب عدم اتباعك للقواعد دي قبل كده؟
شاركنا قصتك في التعليقات

7 responses

  1. كان كورس للأطفال و كنت واضحه فى السعر و لما كان عميل بيقلل السعر كنت بحاول اقنعه إنه معايا هو واخد قيمه أعلى من المنافسين و أتكلم عن المميزات اللى عندى من خبره أو الحصول على شهاده متخصصه

  2. مرة عميل فاصل معايا وقلل السعر جدا وكان اول عميل ليا فوافقت، على أساس هيكون بيننا شغل كتير، لكنه تعبني جدا وقعد يركز في كل تفصيلة لدرجة الإرهاق، وطبعا مجاش منه أي شغل تاني ولا تالت

  3. كانت Contest على موقع دون ذكر اسمه
    كان لسا معنديش خبرة اوي فمواقع الفريلانس.. لقيت واحد طالب فيديو انيميشن 10 ثواني و كان السعر مغري الصراحة و مكانش في ناس كتير مشتركة فيه, فحطيت الentry بتاعتي و كانت احسن واحدة بعدها دخلي في الشات و قعدنا نعمل تعديلات لمدة 4 ايام لحد ما وصلنا للفيديو النهائي و اداني الكونتيست و خلصنا التسليم.. بعد التسليم قفلت نص ساعة بالظبط فتحت لقيت المسابقة اتمسحت و الاكونت اتقفل و الفلوس فين هوب طارت و معاهم 10% من قيمة الجايزة دي بتروح للموقع.. يعني كده العميل خد الشغل و فلوسه و انا اللي اتغرمت وقت و فلوس!!
    دورت كتير في ريديت و منتديات اجنبية لقيت اطنان من البشر حصلهم نفس اللي حصلي و ناس اتنصب عليهم من اول 20 دولار ل1000 دولارعلى نفس الموقع و لما يكلموا خدمة العملاء بيستهونوا بالموضوع و يردوا عليهم ان اكونت اللي عمل البروجيكت اتقفل فمش هيعرفوا يعملوا حاجة و اخبط راسك في الحيط, دورت اكتر لقيت ان النصباية دي بتحصل من 2014 و الموقع مفيش منه رد ده غير مشاكل تانية زي ان ناس كتير مش عارفة تسحب الفلوس اللي كسبتها لحسابها عشان الموقع بيقولهم ان مصدرها اكونت not verified اللي هو اكونت الراجل اللي كان طالب الشغل .. طب هو ازاي اصلا اكونت مش متأمن ينزل بروجيكتات و يدفع و يستقبل فلوس كده عادي لو هنتكلم في نقطة الحماية.

    فحرفيا تجربتي مع الموقع ده كارثية و غالبية الفريلانسرز اللي بيقروا الكلام ده عارفينه كويس. فرسالتي ليك يا صاحبي سيب الموقع ده خالص عشان انت داخل مجال الفريلانسينج تكسب مش تدفع.
    انا لحد دلوقتي معايا سكرين ريكورد للشات و المسابقة و اكونت الراجل “لو اسم الاكونت هو اسمه الحقيقي اصلا” لما كانوا مفتوحين و نسخة من عقد بيع الملكية الفكرية بتاعت الفيديو مني له مش عارف اعمل بيهم ايه لما الموقع نفسه مستهين بالموضوع.. و بفكر اقفل اكونتي عالموقع ده عشان ملاقيش نفسي مثلا داخل في سكة انهم يفتكروني انا اللي عامل الاكونت التاني و عملت بروجيكت وهمي و كسبته لنفسي عشان ارفع الfeedback لنفسي او حاجة زي كدة بس مستخسر ال35 دولار الموجودين اللي حنوا عليا و سابهوملي بعد كل ده :”””

    1. بدون ذكر اسماء ، الموقع هو
      Freelancer.com
      في الحقيقة انا دايما بنصح الناس تتجنب الموقع ده لو لسه بتبدأ
      او انها تخلي بالها كويس جدا
      لان الموقع نفسه متورط في حالات نصب ده غير انه بقي مليان عملاء بتمتهن النصب

      فيه اكتر من مصدر بيقول ان الموقع نفسه بيسمح بوظائف وهمية كتير
      بس عشان يقول في التسويق لنفسه ان اكبر موقع بتنزل عليه وظايف !

      عشان كده في الموقع ده بالذات ، محتاج تخلي بالك كويس
      ولازم تشتغل مع الناس اللي ليها شغل سابق علي الموقع
      متثقش ابدا باي اكونت جديد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *